श्री राघवेन्द्र स्तोत्रम्




श्रीपूर्णबोध-गुरु-तीर्थ-पयोऽब्धि-पारा
कामारि-माऽक्ष-विषमाक्ष-शिरः स्पृशन्ती ।
पूर्वोत्तरामित-तरङ्ग-चरत्-सु-हंसा
देवालि-सेवित-पराङ्घ्रि-पयोज-लग्ना ॥ १ ॥

जीवेश-भेद-गुण-पूर्ति-जगत्-सु-सत्त्व-
नीचोच्च-भाव-मुख-नक्र-गणैः समेता ।
दुर्वाद्यजा-पति-गिलैर्गुरु-राघवेन्द्र-
वाग्-देवता-सरिदमुं विमलीकरोतु ॥ २ ॥

श्री-राघवेन्द्रः सकल-प्रदाता
स्व-पाद-कञ्ज-द्वय-भक्तिमद्‍भ्यः ।
अघाद्रि-सम्भेदन-दृष्टि-वज्रः
क्षमा-सुरेन्द्रोऽवतु मां सदाऽयम् ॥ ३ ॥

श्री-राघवेन्द्रो हरि-पाद-कञ्ज-
निषेवणाल्लब्ध-समस्त-सम्पत् ।
देव-स्वभावो दिविज-द्रुमोऽय-
मिष्टप्रदो मे सततं स भूयात् ॥ ४ ॥

भव्य-स्वरूपो भव-दुःख-तूल-
सङ्गाग्नि-चर्यः सुख-धैर्य-शाली ।
समस्त-दुष्ट-ग्रह-निग्रहेशो
दुरत्ययोपप्लव-सिन्धु-सेतुः ॥ ५ ॥

निरस्त-दोषो निरवद्य-वेषः
प्रत्यर्थि-मूकत्व-निदान-भाषः ।
विद्वत्-परिज्ञेय-महा-विशेषो
वाग्-वैखरी-निर्जित-भव्य-शेषः ॥ ६ ॥

सन्तान-सम्पत्-परिशुद्ध-भक्ति-
विज्ञान-वाग्-देह-सु-पाटवादीन् ।
दत्वा शरीरोत्थ-समस्त-दोषान्
हत्वा स नोऽव्याद् गुरु-राघवेन्द्रः ॥ ७ ॥

यत्-पादोदक-सञ्चयः सुर-नदि-मुख्यापगाऽऽसादिता-
सङ्ख्यानुत्तम-पुण्य-सङ्घ-विलसत्-प्रख्यात-पुण्यावहः ।
दुस्तापत्रय-नाशनो भुवि महा-वन्ध्या-सु-पुत्र-प्रदो
व्यङ्ग-स्वङ्ग-समृद्धि-दो ग्रह-महापापापहस्तं श्रये ॥ ८ ॥

यत-पाद-कञ्ज-रजसा परिभूषिताङ्गा
यत्-पाद-पद्म-मधुपायित-मानसा ये ।
यत-पाद-पद्म-परिकीर्तन-जीर्ण-वाचः
तद्-दर्शनं दुरित-कानन-दाव-भूतम् ॥ ९ ॥

सर्व-तन्त्र-स्वतन्त्रोऽसौ श्री-मध्व-मत-वर्धनः ।
विजयीन्द्र-कराब्जोत्थ-सुधीन्द्र-वर-पुत्रकः ॥ १० ॥

श्रीराघवेन्द्रो यति-राड् गुरुर्मे स्याद् भयापहः ।
ज्ञान-भक्ति-सु-पुत्रायुर्यशः-श्री-पुण्य-वर्धनः ॥ ११ ॥

प्रति-वादि-जय-स्वान्त-भेद-चिह्नादरो गुरुः ।
सर्व-विद्या-प्रवीणोऽन्यो राघवेन्द्रान्न विद्यते ॥ १२ ॥

अपरोक्षीकृत-श्रीशः समुपेक्षित-भावजः ।
अपेक्षित-प्रदाताऽन्यो राघवेन्द्रान्न विद्यते ॥ १३ ॥

दया-दाक्षिण्य-वैराग्य-वाक्-पाटव-मुखाङ्कितः ।
शापानुग्रह-शक्तोऽन्यो राघवेन्द्रान्न विद्यते ॥ १४ ॥

अज्ञान-विस्मृति-भ्रान्ति-संशयापस्मृति-क्षयाः ।
तन्द्रा-कम्प-वचः-कौण्ठ्य-मुखा ये चेन्द्रियोद्भवाः ।
दोषास्ते नाशमायान्ति राघवेन्द्र-प्रसादतः ॥ १५ ॥

“(ॐ)श्री राघवेन्द्राय नमः” इत्यष्टाक्षर-मन्त्रतः ।
जपिताद् भावितान्नित्यमिष्टार्थाः स्युर्न संशयः ॥ १६ ॥

हन्तु नः कायजान् दोषानात्मात्मीय-समुद्भवान् ।
सर्वानपि पुमर्थांश्च ददातु गुरुरात्म-वित् ॥ १७ ॥

इति काल-त्रये नित्यं प्रार्थनां यः करोति सः ।
इहामुत्राप्त-सर्वेष्टो मोदते नात्र संशयः ॥ १८ ॥

अगम्य-महिमा-लोके राघवेन्द्रो महा-यशाः ।
श्री-मध्व-मत-दुग्धाब्धि-चन्द्रोऽवतु सदाऽनघः ॥ १९ ॥

सर्व-यात्रा-फलावाप्तै यथा-शक्ति प्र-दक्षिणम् ।
करोमि तव सिद्धस्य वृन्दावन-गतं-जलम् ।
शिरसा धारयाम्यद्य सर्व-तीर्थ-फलाप्तये ॥ २० ॥

सर्वाभीष्टार्थ-सिद्ध्यर्थं नमस्कारं करोम्यहम् ।
तव सङ्कीर्तनं वेद-शास्त्रार्थ-ज्ञान-सिद्धये ॥ २१ ॥

संसारेऽक्षय-सागरे प्रकृतितोऽगाधे सदा दुस्तरे
सर्वावद्य-जलग्रहैरनुपमे कामादि-भङ्गाकुले ।
नाना-विभ्रम-दुर्भ्रमेऽमित-भय-स्तोमादि-फेनोत्कटे
दुःखोत्कृष्ट-विषे समुद्धर गुरो मां मग्न-रूपं सदा ॥ २२ ॥

राघवेन्द्र-गुरु-स्तोत्रं यः पठेद् भक्ति-पूर्वकम् ।
तस्य कुष्ठादि-रोगाणां निवृत्तिस्त्वरया भवेद् ॥ २३ ॥

अन्धोऽपि दिव्य-दृष्टिः स्यादेड-मूकोऽपि वाक्-पतिः ।
पूर्णायुः पूर्ण-सम्पत्तिः स्तोत्रस्यास्य जपाद् भवेत् ॥ २४ ॥

यः पिबेज्जलमेतेन स्तोत्रेणैवाभि-मन्त्रितम् ।
तस्य कुक्षि-गता दोषाः सर्वे नश्यन्ति तत्-क्षणात् ॥ २५ ॥

यद्-वृन्दावनमासाद्य पङ्गुः खञ्जोऽपि वा जनः ।
स्तोत्रेणानेन यः कुर्यात् प्रदक्षिण-नमस्कृतीः ।
स जङ्घालो भवेदेव गुरुराज-प्रसादतः ॥ २६ ॥

सोम-सूर्यपरागे च पुष्यार्कादि-समागमे ।
योऽनुत्तममिदं स्तोत्रमष्टोत्तरशतं जपेत् ।
भूत-प्रेत-पिशाचादि-पीडा तस्य न जायते ॥ २७ ॥

एतत् स्तोत्रं समुच्चार्य गुरु-वृन्दावनान्तिके ।
दीप-संयोजनाज्ज्ञानं पुत्र-लाभो भवेद् द्रुवम् ॥ २८ ॥

पर-वादि-जयो दिव्य-ज्ञान-भक्त्यादि-वर्धनम् ।
सर्वाभीष्टार्थ-सिद्धिः स्यान्नात्र कार्या विचारणा ॥ २९ ॥

राज-चोर-महाव्याघ्र-सर्प-नक्रादि-पीडनम् ।
न जायतेऽस्य स्तोत्रस्य प्रभावान्नात्र संशयः ॥ ३० ॥

यो भक्त्या गुरु-राघवेन्द्र-चरण-द्वन्द्वं स्मरन् यः पठेत्
स्तोत्रं दिव्यमिदं सदा नहि भवेत् तस्याशुभं किञ्चन ।
किन्त्विष्टार्थ-समृद्धिरेव कमला-नाथ-प्रसादोदयात्
कीर्तिर्दिग्-विदिता विभूतिरतुला “साक्षी हयास्योऽत्र हि” ॥ ३१ ॥

इति श्री-राघवेन्द्रार्य-गुरु-राज-प्रसादतः ।
कृतं स्तोत्रमिदं दिव्यं श्रीमद्भिर्ह्यप्पणाभिधैः ॥ ३२ ॥

पूज्याय राघवेन्द्राय सत्यधर्मरताय च ।
भजतां कल्पवृक्षाय नमतां कामधेनवे ॥ ३३ ॥

दुर्वादिध्वान्तरवये वैष्णवेन्दीवरेन्दवे ।
श्रीराघवेन्द्रगुरवे नमोऽत्यन्तदयालवे ॥ ३४ ॥

॥ इति श्रीमदप्पणाचार्यविरचितं श्रीराघवेन्द्रस्तोत्रम् ॥
Share :
About the Author: This post is written by Abhijit


Read More

 
Online Marketing
Add blog to our blog directory   

Blog Promotion Top Blogs
Promote Your Blog
Free Blog Directory
Blogs Tools Soy Candles

HyperSmash.com